नबिल बैंकले दियो आफ्ना ऋणीलाई ०.२५ प्रतिशत व्याज छुट

लगानीखबर काठमाडौं, नबिल बैंक लिमिटेडले आफ्ना सबै ऋणी ग्राहकहरुलाई शुन्य दशमलव २५ प्रतिशत व्याज छुट दिएको छ । बैंकले साउनमा आफ्ना सबै ऋणी ग्राहकहरूलाई ०.२५ प्रतिशत व्याजदर घटाएको हो । यस्तो छुट खराब कर्जाका ऋणीले प्राप्त गर्ने छैनन् ।  बैंकको यो प्रयासले ऋणीलाई राहत हुनेछ ।

 कोरोना भाइरस (कोभिड १९) महामारीबाट आफ्ना ऋणी गम्भीर समस्यामा परेपछि बैंकले शुन्य दशमलव २५ प्रतिशत छुट दिएको हो । 
बैंकका प्रमुख कार्यकारी अधिकृत अनिल केशरी शाहले भने, नबिल बैंकबाट ऋण लिएका व्यक्ति र संस्थागत ग्राहकहरूले भोग्नुपरेको निरन्तर कठिनाइलाई ध्यानमा राख्दै सबै ऋणीलाई लाग्ने व्याजदरमा ०.२५ प्रतिशत छुट दिएका छौं ।
कुनै व्यक्तिको अटो वा होम लोन छ, वा कम्पनीले लिएको हाइड्रो ऋण छ वा बीचमा अन्य कुनै ऋण लिएको छ भने उसले यो सुविधा पाउनेछन् । तर, खराब ऋणीको सूचीमा रहेको वा समयमै ऋण चुक्ता नगरेको ऋणीले यो सुविधा पाउँदैनन् । 

हालै मात्र कोरोना भाइरस संक्रमण रोकथाम, नियन्त्रण तथा उपचार कोषमा निजी क्षेत्रका सबै भन्दा बढी रकम ६ करोड रूपैयाँ हस्तान्तरण गरेको बैंकले आफ्नो दीर्घकालिन योजनामा सातै प्रदेशमा नबिल सरूवा रोग रोकथाम, नियन्त्रण तथा सहयोग केन्द्रका लागि अस्पताल निर्माण तथा उपचारमा सहयोग गर्न अघी बढ्ने योजना समेत बनाएको छ ।