नोटकाे सुरक्षा कसरी गर्ने ?

लगानी खबर, काठमाडाैँ -  नोटलाई जतनसाथ प्रयोग गर्न नेपाल राष्ट्र बैंकले अनुरोध गरेकाे छ । राष्ट्र बैंकले एक सूचना प्रकाशन गर्दै नोटलाई जतनसाथ प्रयोग गर्न आग्रह गरेकाे हाे ।

राष्ट्र बैंकले भनेकाे छ :

नोट हाम्रो सम्पत्ति हो, नोट सभ्यताको प्रतीक हो, नोटलाई जतनसाथ प्रयोग गरौं ।

नोटको जतन गर्न मनीब्यागको प्रयोग गर्ने बानी बसालौं ।

नोटमा केरमेट नगरौं, नोटलाई मैलो पार्ने कुनै काम नगरौं, सुकिला नोटको प्रयोग गर्ने बानी बसालौँ।

कारोबारको भुक्तानी दिँदा यथाशक्य विद्युतीय माध्यम, कार्ड वा ई-वालेटको प्रयोग गरौं ।

नोटमा टाँचा वा स्टिच लगाउँदा नोट च्यातिने तथा स्टिच निकाल्न गाह्रो हुने र नोटको आयुसमेत घट्ने हुँदा यस्तो कार्य बन्द गरौं ।

धार्मिक अनुष्ठान वा सामाजिक कार्य गर्दा नोटमा रङ, पानी, दुध, रगत आदि नपारौं । बरु खामको प्रयोग गर्ने, दान पेटिकामा खसाल्ने वा रसिद लिई चन्दा दिने गरौं ।

भुक्तानी कारोबार गर्दा जाली वा शंकास्पद नोटहरू पाइएमा नजिकको नेपाल राष्ट्र बैंकको कार्यालय वा अन्य बैंक तथा वित्तीय संस्थामा दाखिला गरौं वा जानकारी दिऔं।