सेयर बजारमा ब्याजदर वृद्धिको नकारात्मक प्रभाव, ७६.६५ अंकले घट्याे नेप्से परिसूचक

लगानी खबर, काठमाडाैँ - बिहीबार पनि सेयर बजारमा उच्च गिरावट देखिएकाे छ । बैंकहरुले भाेलि असोज १ गते, शुक्रबारदेखि लागु हुनेगरी सार्वजनिक गरेको ब्याजदरमा अधिकांश बैंकले निक्षेपको ब्याजदर बढाएका छन् । त्यसकाे असर सेयर बजारमा देखिएकाे छ ।

नेपाल स्टक एक्सचेञ्जका अनुसार आज (बिहीबार) सेयर कारोबार मापक नेप्से परिसूचक ७६.६५ अंकले घटेर २८१२.३८ विन्दुमा झरेकाे छ । नेप्से २.६५ प्रतिशतले घटेकाे हो । यता सेन्सेटिभ परिसूचक पनि १२.७३ अंकले घटेर ५२५.७८ विन्दुमा झरेको छ । 

कूल २२९ वटा कम्पनीकाे एक कराेड ६४ लाख ६८ हजार ५ सय ८ कित्ता सेयर खरिदबिक्री हुँदा ९ अर्ब ३ करोड ३९ लाख ६ सय २३ रूपैयाँ बराबरको कारोबार भएकाे छ ।

स्टकका अनुसार कारोबार भएका कूल १३ उपसमूहमध्ये आज सबै वटा उपसमूहकाे सेयर घटेको छ ।

बिहीबार पनि काराेबार रकममा अरूण भ्याली हाइड्राेपावर डेभलपमेन्ट कम्पनी लिमिटेडले नै अग्रता कायम गरेकाे छ । कम्पनीकाे ३८ कराेड ६० लाख ४३ हजार ५ सय ८ रूपैयाँ बराबरकाे काराेबार भएकाे छ ।

आज जम्मा १० वटा कम्पनीकाे सेयरमूल्य बढेकाे छ । मनकामना लघुवित्तकाे सेयरमूल्यमा सकारात्मक सर्किट लागेकाे छ । कम्पनीकाे सेयरमूल्य १० प्रतिशतले बढेर ८ सय ९९ रूपैयाँ ९० पैसा पुगेकाे छ । 

त्यसैगरी, बिहीबार कर्पाेरेट डेभलपमेन्ट बैंक लिमिटेडकाे सेयरमूल्य सबैभन्दा धेरै घटेकाे छ । कम्पनीकाे सेयरमूल्य ८.१७ प्रतिशतले घटेर ९ सय ५५ रूपैयाँमा झरेकाे हाे ।