ज्योति विकास बैंकको ऋणपत्रमा आवेदन दिने अन्तिम मौका आज

लगानी खबर, काठमाडौं - ज्योति विकास बैंक लिमिटेडले असार २० गते आइतबारबाट निष्कासन तथा बिक्री खुल्ला गरेको ऋणपत्रमा आवेदन दिने आज (असार ३० गते, बुधबार) अन्तिम दिन रहेको छ । यसअघि असार २३ गतेसम्म आवेदन दिन पाइने भनिएकोमा छिटो अवधिमा पर्याप्त आवेदन नपरेको हुनाले आवेदन म्याद लम्बाइएको थियो ।  यो ऋणपत्रमा आज असार ३० गते बैंकिङ समयपछि निष्कासन बन्द गरिने जनाएको हो ।

बैंकले बैंकले १० वर्ष अवधिको लागि 'ज्योति विकास बैंक बण्ड, २०८७' नाममा १ अर्ब ५० करोड रूपैयाँ बराबरको १५ लाख कित्ता ऋणपत्र निष्कासन तथा बिक्री खुला गरेको हो । जसमध्ये बैंकले सर्वसाधारणका लागि ६ लाख कित्ता र व्यक्तिगत रुपमा विभिन्न संघ संस्थालाई ९ लाख कित्ता बिक्री गर्नेछ । यसैगरी, सर्वसाधारणका लागि निष्कासन गरिने कुल ऋणपत्रमध्ये ३० हजार कित्ता ऋणपत्र सामूहिक लगानी कोषका लागि छुट्याइएको छ । 

लगानीकर्ताले यस ऋणपत्रमा न्यूनतम २५ कित्तादेखि अधिकतम ३० हजार कित्ताका लागि आवेदन दिन सक्नेछन् ।

त्यसैगरी, बैंकको उक्त ऋणपत्रमा निष्कासन तथा बिक्री प्रबन्धकको काम एनआइबिएल एस क्यापिटल लिमिटेडले गरेको छ । लगानीकर्ताले एनआइबिएल एस क्यापिटल लिमिटेड, ज्योति विकास बैंक लिमिटेड तथा नेपाल धितोपत्र बोर्डबाट अनुमति प्राप्त सिआश्वा सदस्य बैंक तथा वित्तीय संस्था र तिनका शाखा कार्यालयहरूबाट आवेदन दिन सक्नेछन् ।

९ प्रतिशत ब्याज दिने १० वर्षे यो ऋणपत्रलाई नेपाल धितोपत्र बोर्डले गत जेठ २७ गते निष्कासन अनुमति दिएको थियो। ब्याजको भुक्तानी अर्धवार्षिक रुपमा हुनेछ।