जीवन विकास लघुवित्तको आईपीओमा लगानीकर्ताको ओइरो, पहिलो दिन कति पर्यो आवेदन?

लगानी खबर, काठमाडौं - जीवन विकास लघुवित्त वित्तीय संस्था लिमिटेडको साधारण सेयर (आईपीओ) मा लगानीकर्ताको ओइरो लागेको छ  । कम्पनीले निष्कासन गरेको पहिलो दिनमै आईपीओमा माग भन्दा धेरै आवेदन परेको छ । 

सीडीएससीका अनुसार आज साँझ ५ बजेसम्म कम्पनीको आईपीओमा ६ लाख ६ हजार ६४४ आवेदकले कुल ९४ लाख ७१ हजार २४० कित्ता सेयरका लागि आवेदन दिएका छन् । यो सर्वसाधारणलाई माग गरेको भन्दा ५.१२ गुणा अर्थात् ५.१२ प्रतिशत धेरै हाे। यो आईपीओ पनि गोलाप्रथाबाटै बाँडफाँड हुने निश्चित भएको छ।

संस्थाले  आज (असार ११ गते शुक्रबार) बाट प्रतिकित्ता १०० रुपैयाँ अंकित दरका कूल १९ करोड ७७ लाख ३० हजार रुपैयाँ बराबरको १९ लाख ७७ हजार ३ सय कित्ता आईपीओ निष्कासन तथा बिक्री खुल्ला गरेकाे हाे । जसमध्ये कुल पुँजीको ०.५ प्रतिशतले हुन आउने ३० हजार ४२० कित्ता संस्थाका कर्मचारीहरुलाई र सर्वसाधारणका लागि जारी गर्न लागेको पुँजीको ५ प्रतिशतले हुन आउने ९८ हजार ८६५ कित्ता सामुहिक लगानी कोषका लागि छ्ट्याइएको छ भने बाँकी १८ लाख ४८ हजार १५ कित्ता सर्वसाधारणका लागि छुट्याइएको छ ।

उक्त आईपीओमा लगानीकर्ताहरुले न्यूनतम १० कित्ता र अधिकतममा १ हजार कित्ताका लागि छिटोमा असार १५ गते र ढिलोमा असार २५ गतेसम्म आवेदन दिन सक्नेछन् ।

संस्थाको आईपीओ निष्कासन तथा बिक्री प्रबन्धकको काम एनएमबि क्यापिटल लिमिटेडले गरेकाे छ । लगानीकर्ताहरुले नेपाल धितोपत्रबाट स्वीकृति प्राप्त गरेका सम्पूर्ण सि–आस्बा सदस्य बैंक तथा वित्तीय संस्थाहरु र तिनका तोकिएका शाखाहरुबाट आवेदन दिन सकिनेछ भने अनलाईन मार्फत मेरो सेयर एप र मेरो सेयर सफ्वेयर मार्फत पनि आवेदन दिन सक्नेछन् ।