सर्वोत्तम सिमेन्टको लाभांश आज पारित हुँदै

लगानी खबर, काठमाडौं - सर्वोत्तम सिमेन्ट लिमिटेडको विशेष साधारणसभा आज (असार १० गते)  हुँदैछ। कम्पनीको उक्त सभा काठमाडौंको तीनकुनेस्थित न्यौपाने टावरमा बिहान ११ बजेबाट सुरु हुनेछ।

विशेष साधारण सभामा आर्थिक वर्ष २०७७/७८ सम्मको मुनाफाबाट हालको चुक्ता पूँजीको १९.११८ प्रतिशत बराबरको बोनस सेयर र कर प्रयाेजनका लागि १.००६ प्रतिशत नगद लाभांश वितरण गर्ने प्रस्ताव पारित गरिनेछ ।

त्यसैगरी,सभामा हालको जारी तथा चुक्ता पूँजी वृद्धि गरी संस्थापक र सर्वसाधारण शेयरधनीहरु बीचको पूँजीको अनुपात मिलान गर्ने, प्रबन्धपत्र तथा नियमावलीमा आवश्यक संशाेधन गर्ने प्रस्ताव पनि पारित गरिनेछ । 

कम्पनीको यसअघि गत वर्ष माघ ५ गते भएको दोस्रो वार्षिक साधारणसभाले बुक बिल्डिङ विधिबाट आईपीओ निष्कासन गर्ने विशेष प्रस्ताव पारित गरेको थियो। जसअनुसार कम्पनीले चुक्तापुँजीको १५ प्रतिशतले हुने कुल ६० करोड रुपैयाँबराबरको ६० लाख कित्ता आईपीओ निष्काशन गर्ने निर्णय गरेको छ।