गस्तीमा खटिएका प्रहरीले नै रक्सि चोरी गरेपछि ...

लगानी खबर, काठमाडौं - सिरहामा रक्सी चोरेको आरोपमा एक प्रहरी सहायक निरीक्षक (असई) सहित ३ जना प्रहरी निलम्बनमा परेका छन्  । रक्सी चोरीको आरोप लागेका असई नवल किशोर ठाकुर, जवानद्वय अन्नु कुमार राय र नरेश कुमार रायलाई जिल्ला प्रहरी कार्यालय सिराहाले निलम्बन गरेको हो ।

लहान नगरपालिका वडा नम्बर २३ गढिया चोकस्थित पूजा मदिरा पसलबाट भोड्का रक्सी चोरी गरेको आरोपमा उनीहरुलाई निलम्बन गरिएको जिल्ला प्रहरी कार्यालय सिराहाले जनाएको छ ।

गत जेठ ९ गते गस्तीमा खटिएका उनीहरुले उक्त पसलमा मदिरा सेवन गरी हो–हल्ला गर्ने व्यक्तिहरु नियन्त्रणमा लिन लाग्दा पसलका सञ्चालक भागे र त्यहि मौकामा पसलबाट केही भोड्का रक्सी लिई गएको भिडियो सार्वजनिक भएको थियो ।

प्रहरीका आचरण विपरीत कार्य गरेको पाइएकाले प्रहरी नियमावली २०७१ बमोजिम तीनैजनालाई निलम्बन गरी थप अनुसन्धान भइरहेको प्रहरी नायब उपरीक्षक  शालिग्राम शर्माले बताए।