चिलिमे जलबिद्युतको खुद मुनाफासंगै प्रतिसेयर आम्दानी पनि घट्यो

चिलिमे जलबिद्युत कम्पनीले चालु आर्थिक वर्षको तेस्रो त्रैमासको अपरिष्कृत वित्तीय विवरण प्रकाशन गरेको छ । 

कम्पनीले सार्वजनिक गरेको उक्त विवरण अनुसार तेस्रो त्रैमाससम्ममा ५१ करोड २ लाख रुपैयाँ खुद मुनाफा हासिल गरेको छ जुन गत बर्षको यसै अवधिको तुलनामा २।९२ प्रतिशतले कम हो । गत वर्ष कम्पनीले ५२ करोड ५६ लाख रुपैयाँ नाफा आर्जन गरेको थियो । 

कम्पनीले विद्युत् बिक्रीबाट हुने आम्दानी भने झिनो बृद्धि भएको छ । कम्पनीको यस्तो आम्दानी ०।६९ प्रतिशतले बढेर ८० करोड ९२ लाख रुपैयाँमा पुगेको छ । गत वर्षको सोहि अवधिमा कम्पनीले विद्युत् बिक्रीबाट ८० करोड ३७ लाख रुपैयाँ नाफा कमाएको थियो । 
 
हाल चुक्ता पुँजी ६ अर्ब २८ करोड ७ लाख रुपैयाँ रहेको छ भने जगेडा कोषमा ३ अर्ब ६७ करोड रुपैयाँ रहेको छ । कम्पनीको खुद मुनाफामा ह्रास आएसंगै वार्षिकृत प्रतिसेयर आम्दानी पनि गिरावट आएको छ । गत बर्षको यहि अवधिमा कम्पनीको प्रतिसेयर आम्दानी  १२ रुपैयाँ २७ पैसा रहेकोमा अहिले त्यो घटेर १० रुपैयाँ ८३ पैसा पुगेको छ । त्यस्तै कम्पनीको प्रतिसेयर नेटवर्थ १५८ रुपैयाँ ४७ पैसा रहेको छ ।