ग्रीन लाइफ हाइड्रोको आइपिओ आज बाँडफाँड हुँदै, शेयर पाउने भाग्यमानी कति ?

लगानी खबर, काठमाडौँ - ग्रीन लाइफ हाइड्रोपावर कम्पनी लिमिटेडको साधारण शेयर (आइपीओ) काे बाँडफाँड आज (फागुन ७ गते, शुक्रबार) बाँडफाँड हुँदैछ । उक्त आइपीओकाे प्रि अलोटमेन्ट फागुन ४ गते, मंगलबार सम्पन्न भएकाे थियाे । आइपीओकाे बाँडफाँड बिहान ९ बजे हुने निष्कासन तथा बिक्री प्रबन्धक बीओके क्यापिटल लिमिटेडले जानकारी दिएकाे छ ।

कम्पनीकाे आइपीओमा १३ लाख २६ हजार ७७ जना आवेदकले २ अर्ब ३७ करोड ३० लाख १८ हजार रूपैयाँ बराबरकाे २ करोड ३७ लाख ३० हजार १ सय ८० कित्ताकाे लागि आवेदन दिएका थिए । यो सर्वसाधारणका लागि माग गरिएकाे भन्दा ७.३० गुणा धेरै हो । यस अन्तिम तथ्यांकलाई हेर्दा न्युनतम १० कित्ताको दरले वितरण गर्दा ३ लाख २५ हजार १ सय ६५ जना आवेदकले मात्र शेयर हात पार्नेछन् भने बाँकी १० लाख ९ सय भन्दा धेरै जनाकाे हात खाली हुनेछ ।

कम्पनीले माघ २३ गते, शुक्रबारदेखि  माघ २७ गतेसम्म प्रतिकित्ता १०० रुपैयाँ अंकित दरमा ३४ करोड ९६ लाख ४० हजार रूपैयाँ बराबरको ३४ लाख ९६ हजार ४ सय कित्ता साधारण शेयर  (आइपीओ) निष्कासन तथा बिक्री खुल्ला गरेकाे हाे । जसमध्ये १ लाख ७४ हजार ८२० कित्ता शेयर सामूहिक लगानी कोषका लागि, ६९ हजार ९ सय २८ कित्ता कर्मचारीहरुका लागि र बाँकी ३२ लाख ५१ हजार ६ सय ५२ कित्ता सर्वसाधारणहरुका लागि छुट्याइएकाे थियाे ।