एनआइसी एशिया क्यापिटलको डाइनामिक डेब्ट फन्डमा पहिलो दिनमा कति पर्याे आवेदन ?

लगानी खबर, काठमाडौँ - एनआईसी एशिया बैंक कोष प्रबर्द्धक रहेको एनआईसी एशिया म्युचुअल फण्ड अन्तर्गत सञ्चालन हुने एनआईसी एशिया डाइनामिक डेब्ट फण्डको इकाई आज (मंसिर १२ गते, शुक्रबार) बाट खुल्ला भएकाे छ ।

पहिलाे दिन बेलुका ५ बजेसम्ममा १३ हजार ९ सय २१ जना आवेदकले १ अर्ब ३५ कराेड ५ लाख ८८ हजार रूपैयाँ बराबरकाे १३ कराेड ५० लाख ५८ हजार ८ सय कित्ता इकाईकाे लागि आवेदन दिएका बिक्री प्रबन्धक एनआईसी एशिया क्यापिटल लिमिटेडले जानकारी दिएकाे छ ।

योजना व्यवस्थापक एनआईसी एशिया क्यापिटलले प्रति इकाई १० रुपैयाँका दरले ५० करोड रुपैयाँ बराबरको ५ करोड इकाई बिक्री खुल्ला गरेकाे हाे । जसमध्ये, १५ प्रतिशत अर्थात ७५ लाख इकाई कोष प्रबर्द्धक एनआईसी एशिया बैंकलाई छुट्याइएको छ भने बाँकी ४ करोड २५ लाख इकाई सार्वजनिक रुपमा बिक्री खुला गरिनेछ । जसमध्ये पहिलो चरणमा १ करोड २५ लाख इकाई  सर्वसाधारणका लागि बिक्री खुला गरिएको हो ।

कहिलेसम्म दिने आवेदन ?

यस खुलामुखी योजनामा छिटोमा मंसिर १६ गते र ढिलोमा मंसिर २६ गतेसम्म आवेदन दिन सकिनेछ ।

कति दिने आवेदन ?

यस योजनामा प्रति इकाई १० रुपैयाँका दरले न्यूनतम १०० इकाईका लागि र अधिकतम ५० लाख इकाईसम्म आवेदन दिन सकिनेछ ।

कहाँबाट दिने आवेदन ?

लगानीकर्ताले सी–आस्वा सेवा प्राप्त बैंक तथा वित्तीय संस्थाबाट आवेदन दिन सक्नेछन् ।

काे हाे बिक्री प्रबन्धक ?

 यसमा बिक्री प्रबन्धकको काम एनआईसी एशिया क्यापिटलले गरेको छ ।