युनाईटेड इदी–मर्दीको आइपिओ निष्कासन मिति सर्यो : अब तिहार पछि मात्र !

लगानी खबर, काठमाडौँ - युनाईटेड इदी–मर्दी एण्ड आरबि हाइड्रोपावर लिमिटेडले कात्तिक २७ गते बिहीबारबाट सर्वसाधारणका लागि निष्कासन गर्ने भनेकाे साधारण शेयर (आइपिओ) निष्कासन तथा बिक्री खुल्ला गर्ने  मिति परिवर्तन भएको छ । अब उक्त आइपिओ मंसिर ३ गतेबाट निष्कासन हुने भएकाे छ ।

कम्पनीले एक सूचना प्रकाशन गर्दै नेपाल धितोपत्र बोर्डको निर्देशन अनुसार आइपिओ निष्कासन गर्ने  मिति परिवर्तन भएको जानकारी दिएकाे छ ।

नेपाल धिताेपत्र बाेर्डले कम्पनीलाई जारी पूँजीको २५ प्रतिशत साधारण शेयर (आइपिओ) निष्कासन तथा बिक्री खुल्ला गर्नका लागि अनुमति दिएको छ । जसमध्ये कम्पनीले पहिलो चरणमा आयोजना प्रभावित स्थानीयका लागि ४ लाख २० हजार कित्ता निष्कासन तथा बिक्री गरिसकेकाे छ । कम्पनीले असोज ७ गते बुधबारदेखि कात्तिक ६ गते, बिहीबारसम्म आयोजना प्रभावित स्थानीय बासिन्दाका लागि निष्कासन तथा बिक्री खुल्ला गरेको थियाे ।

अब दोस्रो चरणमा सर्वसाधारणका लागि ८ लाख ७३ हजार ९ सय १० कित्ता  साधारण शेयर (आइपिओ) निष्कासन तथा बिक्री खुल्ला गर्न लागेकाे हाे । कम्पनीले पहिलाे चरणमा बिक्री नभएकाे २ लाख ४३ हजार ९ सय १० कित्ता समेत जाेडेर  ८ लाख ७३ हजार ९ सय १० कित्ता साधारण शेयर (आइपिओ) निष्कासन गर्न लागेकाे हाे । जसमध्ये ४३ हजार ६९६ कित्ता शेयर सामूहिक लगानी कोषका लागि, १७ हजार ४ सय ७८ कित्ता कर्मचारीहरुका लागि र बाँकी ८ लाख १२ हजार ७ सय ३६ कित्ता सर्वसाधारणहरुका लागि निष्कासन गर्न लागिएको हो ।